Një 42-vjeçar shqiptar është gjetur i pajetë në një stallë në zonën e Mesinisë, pranë Kalamata, duke ngritur dyshime për një ngjarje kriminale.

Sipas mediave greke, viktima kishte një plagë në kokë, e cila dyshohet të jetë shkaktuar nga armë zjarri. Trupi i pajetë u zbulua në zonën Bournia, ndërsa autoritetet kanë nisur menjëherë hetimet për zbardhjen e plotë të rrethanave.

Policia në Greqi po shqyrton pistën e vrasjes dhe ka marrë në pyetje disa persona që kanë pasur lidhje me 42-vjeçarin. Sipas dëshmive paraprake, dyshohet se në ngjarje mund të jetë përfshirë një prej punëtorëve të tij, megjithatë ende nuk ka një version zyrtar përfundimtar.

Ndërkohë, priten rezultatet e ekspertizës mjeko-ligjore, të cilat do të ndihmojnë në përcaktimin e shkakut të vdekjes dhe në orientimin e mëtejshëm të hetimeve.