Një skandal i madh po hetohet nga prokurorët në Turqi, ku është përfshirë një grup kriminal që akuzohet për pastrim parash, baste të paligjshme dhe trukim ndeshjesh futbolli. Sipas medias turke Mynet, grupi kriminal është i dyshuar për ndikimin në manipulimin e ndeshjeve të futbollit në disa klube ballkanike, si dhe në Gjeorgji.

Në këtë skandal janë përfshirë emra të njohur të showbiz-it turk, përfshirë këngëtarin Serdar Ortaç, prezantuesin Mehmet Ali Erbil dhe ish-futbollistin Batuhan Karadeniz. Ortaç dhe Erbil janë duke u hetuar në gjendje të lirë, ndërsa Karadeniz thuhet se është arratisur jashtë vendit.

Si Funksiononte Skema

Grupi kriminal ka përdorur VIP-a të njohur për të reklamuar faqet e paligjshme të basteve, duke ofruar mundësi për qytetarët që të luajnë baste online. Roli i VIP-ave ishte që të përdornin rrjetet e tyre sociale për të tërhequr sa më shumë klientë në këto platforma të paligjshme. Për këtë shërbim, ata janë paguar me shuma të mëdha, duke arritur deri në 1 milion dollarë për postime të caktuara.

Sipas Mynet, dyshohet se paratë e fituara në mënyrë të paligjshme nga grupet kriminale janë përdorur për të pastruar paratë, me ndihmën e VIP-ave, megjithëse roli i tyre ende po hetohet.

Përfshirja e Klubeve Ballkanike dhe Shqiptare në Baste

Në skemën e basteve të paligjshme janë përfshirë edhe klube futbolli nga Shqipëria, Maqedonia e Veriut dhe Gjeorgjia. Mediat turke theksojnë se organizata kriminale ka arritur të blejë skuadra futbolli në Shqipëri dhe të manipulojë ndeshjet për të siguruar fitime të mëdha, duke siguruar gjithmonë humbjen e bastexhinjve.

Pritet që në ditët në vijim të dalin më shumë detaje rreth mënyrës se si funksiononte kjo skemë dhe ndikimi i saj në Turqi dhe në shtetet e tjera të Ballkanit.