Roma – Një zbulim i fundit i paparacit të njohur italian, Fabrizio Corona, ka ndezur polemika të mëdha në mediat italiane, duke hedhur dyshime mbi një sistem të supozuar të korruptuar dhe të shthurur që, sipas tij, ka dominuar televizionin italian për dy dekada.

Corona ka publikuar mesazhe dhe fotografi në një episod të postuar në “YouTube” me titullin “Çmimi i suksesit”, ku pretendon se gazetari dhe producenti i njohur Alfonso Signorini ka përfituar nga pozicioni i tij për të marrë avantazhe seksuale nga pjesëmarrësit në reality show-n “Grande Fratello”.

“Nëse nuk fle me Signorinin, nuk futesh dot në ‘Grande Fratello’”, deklaron Corona në videon e tij, duke iu referuar rastit të një pjesëmarrësi të vitit 2022, Antonio Medugno, një i ri nga Napoli, i cili sipas paparacit, ishte i detyruar të pranonte marrëdhënie intime me Signorinin për të siguruar vendin në program.

Ky episod ka shkaktuar një reagim të menjëhershëm në mediat italiane dhe ka rihapur debatin mbi etikën në industrinë e televizionit dhe mbrojtjen e të rinjve që hyjnë në skenën publike. Autoritetet dhe redaksitë e programeve televizive ende nuk kanë dhënë komente zyrtare mbi akuzat e Corona-s, ndërsa opinioni publik ndjek me shqetësim zhvillimet e këtij skandali.