Kreu i Partisë Demokratike, Lulzim Basha, iu uroi mirëseardhjen rreth 23 mijë trupave të NATO, që po zhvillojnë stërvitjen më të madhe ushtarake në Shqipëri “Defender Europe 21”.
Në një dalje për media, Basha iu bëri thirrje Forcave të Armatosura të Shqipërisë të mbajnë lart standardin dhe flamurin e kombit tonë në këtë stërvitje.
Sipas kryedemokratit, kjo stërvitje do iu japë një mesazh të qartë rivalëve potencialë se aleanca është e gatshme të përballet me çdo agresion dhe ta zmbrapsë atë.
“Së pari, dua të falënderoj nga zemra të gjithë forcat pjesëmarrëse të NATO-s në veçanti forcat e Shteteve të Bashkuara të Amerikës dhe të gjithë vendeve pjesëmarrëse në një ushtrim historik “Defender Europe 21”. Kam krenarinë e veçantë dhe privilegji t’ju uroj mirë se ardhjen këtij ushtrimi të paprecedentë të NATO-s që nga përfundimi i Luftës së Dytë Botërore në bregun lindor të Adriatikut dhe të shpreh krenarinë legjitime që Partia Demokratike, qeverisja jonë dhe unë në rolin tim si Ministër i jashtëm mundësuam atë që dikur dukej si një ëndërr e pamundur anëtarësimin e Shqipërisë në Aleancën më të fuqishme politike, ushtarakë të botës. Ju uroj mirë se ardhjen të gjithë forcave aleate të kryesuara nga partneri ynë strategjik dhe ju uroj Forcave të Armatosura të Republikës së Shqipërisë ndonëse në kushte shumë të vështira prej neglizhencës 8-vjeçare që ta mbajnë lart standardin, flamurin dhe krenarinë e kombit tonë me pjesëmarrjen në këtë ushtrim të një rëndësie të veçantë strategjike që do t’i tregojë të gjithë rivalëve potencialë të Aleancës së Atlantikut të Veriut se aleanca është e gatshme të përballet me çdo agresion dhe ta zmbraps atë nëse vlerat rreth të cilave në bashkohemi janë të pacenueshme duke filluar me vlerat e lirisë, e demokracisë e duke vazhduar me stabilitetin rajonal ballkanik që fillon me respektimin e kufijve e integritetin territorial të të gjitha shteteve duke përfshirë Republikën e Kosovës. Le të jetë ky një mesazh i qarrtë për këdo që ëndërron kthimin e Ballkanit në një fuçi baruti apo në një teatër lojërash territoriale dhe një paralajmërim i qartë për despotët e Ballkanit se kjo aleancë nuk një aleancë ushtarako-politike , por një aleancë politiko-ushtarake në bazë të së cilës qëndron demokracia,, pra zgjedhjet e lira dhe të ndershme dhe sundimi i ligjit”, tha Basha.
