Rusia ka sulmuar me dronë disa zona të Ukrainës, duke shkaktuar tetë viktima, mes tyre tre fëmijë, sipas autoriteteve ukrainase.

Pas sulmeve ruse, Ukraina u kundërpërgjigj me një valë dronësh ndaj territorit rus. Guvernatori i rajonit të Moskës, Andrei Vorobyev, deklaroi se dy persona u vranë dhe gjashtë të tjerë u plagosën.

Autoritetet ruse thanë se qindra dronë u rrëzuan, ndërsa u raportuan dëme në banesa, një depo dhe një strukturë të një rafinerie nafte.

Vorobyev deklaroi se 249 dronë ishin rrëzuar në rajonin e Moskës. Sipas tij, një grua 44-vjeçare u vra në Sofyino pasi një dron goditi një ndërtesë banimi trekatëshe. Pesë persona, mes tyre dy fëmijë, u plagosën.

Sulmet shkaktuan gjithashtu kufizime të përkohshme në aeroportet e Moskës. Në Sheremetyevo pasagjerët u paralajmëruan për kufizimet, ndërsa në Vnukovo u ndaluan përkohësisht të gjitha mbërritjet dhe nisjet. Kufizimet u hoqën të dielën në mëngjes, megjithëse autoritetet paralajmëruan për vonesa të mundshme të fluturimeve.

Tetë viktima në Ukrainë, mes tyre tre fëmijë

Ndërkohë, në Ukrainë, një zyrtar rajonal deklaroi se tetë persona, përfshirë tre fëmijë, u vranë në sulmet ruse të së shtunës në rajonet e Kievit dhe Sumit.

Në qytetin Fastiv, një nënë dhe dy fëmijët e saj të vegjël u vranë në një sulm rus, ndërsa disa shtëpi private u dëmtuan.

Në Vyshhorod, një fëmijë i plagosur në një sulm tjetër humbi jetën më vonë në spital.

Ndërsa në rajonin e Sumit, katër persona u vranë kur një dron rus goditi automjetin me të cilin po udhëtonin, sipas zyrtarit lokal Oleh Hryhorov.

Sulmet e ndërsjella me dronë vijnë në një periudhë kur luftimet mes Rusisë dhe Ukrainës vijojnë të shkaktojnë viktima dhe dëme në zonat urbane dhe infrastrukturore të të dyja palëve.