Hagë – Gjatë deklaratës së tij para trupit gjykues në Dhomat e Specializuara, Rexhep Selimi tha se Prokuroria ka për synim dënimin e UÇK-së dhe të vetë pavarësisë së Kosovës.

“Kjo Prokurori e ka synim dënimin e UÇK-së, dënimin e Pavarësisë së Kosovës”, u shpreh ai, duke shtuar se lufta çlirimtare nuk mund të barazohet me, sipas tij, politikat shtetërore represive të Serbisë.

Selimi deklaroi se kanë kaluar më shumë se pesë vite nga nisja e procesit dhe se, megjithë vështirësitë, ai shpreson që trupi gjykues të ketë kuptuar kontekstin e luftës në Kosovë. Ai e cilësoi aktakuzën si të pabazuar dhe tha se rrjedha e procesit, sipas tij, e ka vërtetuar këtë.

Në fjalën e tij, Selimi theksoi se nuk ishte ngritur për të mbrojtur veten personalisht, pasi këtë po e bëjnë avokatët e tij, por për të kërkuar ushtrimin e drejtësisë nga gjykata.

Ai pretendoi se Prokuroria po e paraqet kërkesën për pavarësi si pjesë të një “Ndërmarrjeje të Përbashkët Kriminale”, duke ngritur pikëpyetje se kundër kujt, sipas tij, është drejtuar aktakuza – ndaj individëve apo ndaj vetë synimit për pavarësi.

Selimi kundërshtoi gjithashtu pretendimin se në Kosovë ka pasur ndarje mes forcave politike për çështjen e statusit, duke deklaruar se, sipas tij, të gjitha partitë politike ishin për pavarësi dhe jo për autonomi nën Serbi.

“Ta barazosh rezistencën e një populli me plan kriminal është një barazim jo vetëm i pasaktë, por edhe thellësisht i padrejtë. Historia e Kosovës nuk mund të rishkruhet, aq më tepër në një sallë gjyqi. Historinë e Kosovës e kanë shkruar qytetarët e saj”, deklaroi ai.

Në përmbyllje, Selimi iu referua kontekstit të viteve të luftës, duke thënë se përballë dhunës dhe represionit të asaj kohe, rezistenca ishte e domosdoshme. Ai përmendi gjithashtu ish-udhëheqësin serb Slobodan Milošević, si dhe komandantin e UÇK-së Adem Jashari, duke theksuar se vendimi për t’iu bashkuar rezistencës ishte, sipas tij, i lidhur me bindjen se Kosova kishte nevojë për vetëmbrojtje.

Procesi gjyqësor ndaj Selimit dhe ish-drejtuesve të tjerë të UÇK-së vijon në Hagë, ndërsa trupi gjykues pritet të shqyrtojë argumentet e palëve përpara vendimit përfundimtar.