Jorida Tabaku ka kritikuar mënyrën e funksionimit të procesit ligjvënës në Kuvend, gjatë aktivitetit “Dialog Politik me fokus Anëtarësimin në BE: Përforcimi i Cilësisë Legjislative Përmes Vendimmarrjes Gjithëpërfshirëse”, të organizuar nga Instituti për Demokraci dhe Ndërmjetësim.

Në fjalën e saj, kryetarja e Komisionit për të Drejtat e Njeriut dhe Mjetet e Informimit Publik deklaroi se procesi i integrimit europian nuk duhet parë vetëm si miratim ligjesh, por si një test për funksionimin e institucioneve dhe demokracisë në vend.

“Integrimi europian nuk është një garë për numrin e ligjeve të miratuara. Ai është një test i zbatimit të tyre, i funksionimit të institucioneve dhe i cilësisë së demokracisë”, u shpreh Tabaku.

Deputetja demokrate ngriti shqetësime për mënyrën si, sipas saj, po zhvillohet procesi i ligjbërjes në Kuvend, duke pretenduar se vendimmarrja dominohet nga vullneti i shumicës dhe jo nga procedurat parlamentare apo debati demokratik.

Tabaku kritikoi përdorimin e procedurave të përshpejtuara për miratimin e ligjeve, ndërsa shtoi se nismat që lidhen me kërkesat e Bashkimi Europian mbeten të vonuara.

“Nuk ka debat të vërtetë për integrimin europian. Ka shmangie, fshehje dhe propagandë”, deklaroi ajo.

Sipas Tabakut, kriza demokratike nis kur kufizohet roli i opozitës dhe dobësohet autonomia e institucioneve të pavarura.

“Evropa nuk matet me ligjet e votuara brenda një nate. Ajo matet me shtetin e së drejtës, standardet demokratike dhe respektimin e pluralizmit”, përfundoi deputetja e PD-së.

Në aktivitet morën pjesë edhe Silvio Gonzato, Niklas Ström, deputetë dhe përfaqësues të shoqërisë civile.