Debati parlamentar pas raportimit të kreut të SPAK, Altin Dumani, në Kuvend, u shoqërua me kritika të forta nga opozita. Një nga zërat më të ashpër ishte deputetja e Partisë Demokratike, Jorida Tabaku, e cila riktheu në vëmendje aferën e inceneratorëve, duke e cilësuar atë si “lakmusin e vërtetë” të funksionimit të drejtësisë shqiptare.

“Zoti Dumani, e dëgjova përgjigjen tuaj. Çështjen e inceneratorëve PD e ka nisur që në vitin 2017. Në vitin 2020 kemi dorëzuar tre dosje për tre inceneratorët dhe më pas kam sjellë 12 padi të veçanta, duke nisur nga kryeministri, Engjëll Agaci, Belinda Balluku e të tjerë. Asnjë prej tyre sot nuk është përballur me drejtësinë,” — deklaroi Tabaku.

Deputetja demokrate theksoi se aferat e inceneratorëve përfaqësojnë “manualin e kapjes së shtetit”, ku vendimet qeveritare janë marrë në favor të interesave private.

“Dy biznesmenë erdhën me duar në xhepa dhe shkruanin vetë vendimet e qeverisë që miratoi 17 akte brenda një dite,” — u shpreh ajo.

Sipas Tabakut, pavarësisht hetimeve të zhvilluara nga SPAK, mungesa e përgjegjësisë politike mbetet dëshmi e pabarazisë përpara ligjit.

“Drejtësinë për inceneratorët e kërkojmë prej tetë vitesh, për të treguar që në Shqipëri mund të ketë shpresë. Lakmusi i SPAK është inceneratori. Fakti që një grup prej 12 personash që nuk mund të kishin vepruar të lirë vazhdojnë të paguhen me miliona euro, tregon se drejtësia nuk është e barabartë për të gjithë,” — tha Tabaku.

Debati për veprimtarinë e SPAK pritet të vijojë gjatë ditës, ndërsa deputetët e mazhorancës dhe opozitës kanë paralajmëruar përplasje të reja lidhur me pavarësinë e institucioneve të drejtësisë.