Kreu i SPAK, Klodian Braho, ka zhvilluar një takim në ambientet e institucionit me ministren e Drejtësisë së Austrisë, Anna Sporrer.

Vizita e Sporrer në Shqipëri vjen në kuadër të një turi rajonal që përfshin edhe Mali i Zi, ndërsa fokusi kryesor i bisedimeve lidhet me çështjet e ekstradimit dhe bashkëpunimit juridik ndërkombëtar.

Sipas raportimeve të mediave austriake, në qendër të kësaj vizite janë përpjekjet për të negociuar dhe forcuar marrëveshjet që lidhen me transferimin e të dënuarve.

“Në mënyrë specifike, qëllimi është të negociohen ose të forcohen marrëveshjet që do t’u lejonin qytetarëve të dënuar shqiptarë dhe malazezë të vuajnë dënimet e tyre në vendet e tyre të origjinës, duke lehtësuar kështu presionin mbi burgjet e mbipopulluara të Austrisë”, raportojnë mediat.

Takimi në SPAK konsiderohet një hap i rëndësishëm në drejtim të rritjes së bashkëpunimit mes institucioneve të drejtësisë së dy vendeve, veçanërisht në luftën kundër krimit dhe menaxhimin e çështjeve penale ndërkufitare.