Një incident i papritur ka ndodhur të enjten në rrugën kryesore të qytetit të Manastirit, ku disa të rinj rreth moshës 20-vjeçare iu afruan një 32-vjeçari dhe tentuan t’i heqin me forcë bluzën që kishte veshur.

Sipas denoncimit të viktimës, bluza kishte simbole që dyshohet se i përkisnin Shqipërisë, dhe besohet se kjo ishte shkaku i sulmit. Kur kuptoi se nuk mund të mbrohej, 32-vjeçari ia dorëzoi vetë bluzën personave të panjohur, të cilët më pas u larguan nga vendngjarja.

Ministria e Punëve të Brendshme e Maqedonisë së Veriut konfirmoi incidentin në një njoftim zyrtar, duke bërë të ditur se policia ka nisur hetimet dhe po punon për identifikimin e autorëve.