Një ngjarje e rëndë ka ndodhur sot në fshatin Peshtan Bregas, Njësia Administrative Frakull, Bashkia Fier, ku një 36-vjeçar, Hamza Duraj, ka humbur jetën aksidentalisht gjatë punës në tokat bujqësore.

Sipas burimeve nga vendi i ngjarjes dhe Drejtoria Vendore e Policisë Fier, Duraj kishte dalë për të punuar tokën me frezë, por dyshohet se është penguar aksidentalisht dhe ka rënë në tokë. Në atë moment, mjeti bujqësor i ka kaluar sipër trupit, duke i shkaktuar plagë fatale dhe vdekje të menjëhershme.

Trupi i pajetë u gjet nga familjarët, të cilët kishin shqetësim pasi nuk merrnin përgjigje nga thirrjet e tij telefonike, dhe menjëherë njoftuan shërbimet e emergjencës. Autoritetet po vijojnë hetimet për saktësimin e rrethanave të ngjarjes.