Një ngjarje tragjike është regjistruar paraditen e së enjtes në plazhin e Orikumit, ku një turist shqiptar, rreth 75 vjeç, ka humbur jetën pasi dyshohet se ka pësuar një infarkt kardiak.

Sipas informacioneve paraprake, i moshuari kishte shkuar për pushime së bashku me familjen. Rreth orës 11:30, menjëherë pasi hyri në det, ai është ndier keq dhe është drejtuar drejt bregut, ku ka humbur ndjenjat.

Pushuesit dhe familjarët ndërhynë menjëherë, duke e nxjerrë nga uji dhe duke njoftuar shërbimet e emergjencës. Në vendngjarje mbërriti ambulanca e Orikumit, ndërsa ekipi mjekësor kreu manovrat e reanimimit, por pa mundur t’i shpëtojë jetën.

Dyshimet e para janë se 75-vjeçari ka ndërruar jetë si pasojë e një infarkti kardiak.

Shkaku i saktë i vdekjes dhe rrethanat e plota të ngjarjes pritet të konfirmohen nga autoritetet kompetente pas përfundimit të veprimeve procedurale.