Një aksident i rëndë rrugor ka ndodhur në veriperëndim të Serbisë, ku një autobus që transportonte punëtorë të një fabrike është përmbysur, duke shkaktuar tre viktima dhe dhjetëra të plagosur, disa prej të cilëve në gjendje kritike.

Ngjarja ndodhi në rrugën Sremska Mitrovica – Jarak, rreth 70 kilometra nga Beogradi. Sipas Ministrisë së Brendshme serbe, autobusi dykatësh doli nga rruga për arsye ende të paqarta dhe përfundoi në një kanal anësor. Shoferi është arrestuar ndërsa hetimet për shkakun e aksidentit vijojnë.

Pamjet e publikuara nga autoritetet tregojnë autobusin e shkatërruar plotësisht, të përmbysur në rrugë, ndërsa ekipet e emergjencës punonin për nxjerrjen e pasagjerëve të bllokuar. Fillimisht u raportua për dy viktima, por më vonë një tjetër pasagjer ndërroi jetë në spital.

Sipas drejtorit të spitalit lokal, Vojislav Mirnić, nga 61 persona të shtruar, 39 vazhdojnë të trajtohen, shumë prej tyre në gjendje të rëndë. Autobusi transportonte punëtorë të kompanisë HealthCare, që prodhon jastëkë dhe dyshekë me material “memory foam”, pjesë e një kompanie kineze që operon në Serbi.

Autoritetet serbe po vijojnë hetimet për të zbuluar nëse shkaku i tragjedisë ishte gabim njerëzor, defekt teknik apo kushtet e rrugës, ndërsa komuniteti lokal është tronditur nga aksidenti më i rëndë i viteve të fundit në atë zonë.