Një ngjarje e rëndë ka tronditur mbrëmjen e sotme qytetin e Vlorës, ku gazetari Enrik Mehmeti ka humbur jetën si pasojë e një aksidenti tragjik.

Ngjarja ka ndodhur në zonën e plazhit të Zvërnecit. Sipas të dhënave paraprake, aksidenti ka ndodhur teksa gazetari po udhëtonte me një motor me katër rrota.

Nga informacionet e para dhe dëshmitë e mbledhura në vendngjarje, dyshohet se, për shkaqe ende të paqarta, mjeti ka humbur kontrollin dhe është përmbysur, duke u rrokullisur disa herë.

Gjatë aksidentit, një pjesë metalike e motorit e ka goditur rëndë Mehmetin në kraharor, duke i shkaktuar dëmtime fatale.

Ai është transportuar me urgjencë drejt Spitalit Rajonal të Vlorës, por, pavarësisht përpjekjeve të mjekëve, nuk ka mundur t’u mbijetojë plagëve të marra.

Në vendin e ngjarjes kanë mbërritur shërbimet e Policisë, të cilat kanë nisur hetimet për zbardhjen e plotë të rrethanave dhe shkaqeve të aksidentit.