Një aksident i rëndë rrugor me pasojë humbjen e jetës së një personi është regjistruar pasditen e sotme në aksin nacional Çermë–Divjakë, në fshatin Çermë-Shkumbin.

Sipas informacioneve paraprake, dy automjete, një BMW dhe një Opel, janë përplasur ballë për ballë në rrethana që ende po hetohen nga autoritetet.

Si pasojë e përplasjes së fortë, ka humbur jetën në vendngjarje drejtuesi i automjetit Opel, 39-vjeçari Bajram Kaçani, baba i tre fëmijëve.

Nga aksidenti kanë mbetur të plagosur edhe pesë personat që udhëtonin me automjetin BMW. Mes tyre ndodhen edhe tre fëmijë, të cilët janë transportuar me urgjencë në Spitalin e Lushnjës për të marrë ndihmën mjekësore.

Sipas burimeve spitalore, fëmijët ndodhen jashtë rrezikut për jetën, ndërsa të lënduarit e tjerë po marrin trajtimin e nevojshëm.

Në vendngjarje kanë mbërritur menjëherë shërbimet e Policisë Rrugore dhe grupi hetimor, të cilët po kryejnë veprimet procedurale për dokumentimin e plotë të rrethanave të aksidentit.

Nën drejtimin e Prokurorisë, hetimet vijojnë, ndërsa paraprakisht po verifikohen të gjitha pistat që mund të kenë çuar në këtë aksident tragjik.