Një ngjarje e rëndë ka tronditur qytetin e Tijuana-s në Meksikë, pranë kampit stërvitor të kombëtares së Iranit, ku autoritetet kanë gjetur një trup të pajetë brenda një automjeti tip SUV të parkuar prej disa ditësh.

Sipas mediave lokale, viktima u zbulua brenda një automjeti gri të lënë në një parking pranë një qendre tregtare, përballë stadiumit “Estadio Caliente”, ku kombëtarja iraniane po zhvillon përgatitjet për ndeshjet e Kupës së Botës 2026.

Burimet bëjnë me dije se trupi ishte në gjendje të avancuar dekompozimi, i mbështjellë me një qese të zezë dhe me shenja të dukshme dhune, çka ka ngritur dyshime se bëhet fjalë për një vrasje.

Sipas autoriteteve, automjeti kishte qëndruar në të njëjtin vend që nga dita e mërkurë, duke tërhequr vëmendjen e hetuesve në një zonë që njihet për nivele të larta kriminaliteti.

Pavarësisht zbulimit makabër dhe afërsisë së ngjarjes me kampin e kombëtares iraniane, ekipi ka vijuar normalisht seancat stërvitore brenda perimetrit të sigurisë të vendosur nga autoritetet meksikane.

Policia ka izoluar zonën dhe ka nisur hetimet për identifikimin e viktimës, si dhe për zbardhjen e plotë të rrethanave të ngjarjes. Deri më tani nuk është raportuar për ndonjë lidhje mes incidentit dhe delegacionit të kombëtares së Iranit.