Turqia është rikthyer si investitori më i madh në Shqipëri gjatë tremujorit të dytë të këtij viti, sipas të dhënave më të fundit të Bankës së Shqipërisë.

Gjatë periudhës prill-qershor, investimet turke në vend arritën në 64 milionë euro, duke e renditur Turqinë në krye të vendeve investuese në Shqipëri.

Austria, e cila në tremujorin e parë ishte investitori më i madh, gjatë tremujorit të dytë u rendit në vendin e dytë, me 62 milionë euro investime.

Historikisht, ndër investitorët e pranishëm në Shqipëri përfshihen Turqia, Austria, Holanda, Italia dhe Kosova.

Ndërkohë, gjatë muajve prill-qershor, Ishujt Kajman dhe Mbretëria e Bashkuar kanë shënuar një rritje të ndjeshme të investimeve, duke ndikuar në rritjen e vlerës totale të investimeve në 741 milionë euro.

Ishujt Kajman janë përfshirë për herë të parë në treshen e investitorëve më të mëdhenj në Shqipëri, me 53 milionë euro investime.

Në anën tjetër, Emiratet e Bashkuara Arabe, Kina, Norvegjia, Suedia dhe Serbia renditen ndër vendet me nivelet më të ulëta të investimeve në Shqipëri gjatë tremujorit të dytë, me vlera minimale investimesh.