Një ditë pushimi në liqenin Vico, në rajonin italian të Lazios, është kthyer në një dramë për ministren italiane të Familjes, Eugenia Roccella. Bashkëshorti i saj, Luigi Cavallari, 84 vjeç, rezulton i zhdukur prej më shumë se 24 orësh.

Sipas informacioneve paraprake, çifti kishte marrë me qira një varkë dhe po lundronte në liqen, kur Cavallari vendosi të hidhej në ujë për t’u freskuar nga temperaturat e larta.

Pak çaste më vonë, ai doli në sipërfaqe duke u ankuar se nuk ndihej mirë, por nuk arriti të rikthehej në varkë, e cila nuk ishte e ankoruar. Ministrja njoftoi menjëherë shërbimet e emergjencës.

Ngjarja ndodhi në liqenin Vico, rreth 70 kilometra larg Romës, një liqen me origjinë vullkanike, i njohur për temperaturat e ulëta në thellësi dhe rrymat e forta nënujore.

Hetuesit po shqyrtojnë si pistë kryesore një shok termik të shkaktuar nga kontrasti mes temperaturës së lartë të ajrit dhe ujit të ftohtë, ndërsa nuk përjashtohet as mundësia që 84-vjeçari të jetë tërhequr nga rrymat.

Kërkimet vijojnë prej më shumë se 24 orësh, por deri tani pa rezultat. Në operacion janë angazhuar zhytës të zjarrfikësve, karabinierëve dhe Guardia di Finanza, një robot nënujor i pajisur me kamera nate, si edhe një helikopter që po kontrollon zonën nga ajri.

Sipas autoriteteve, operacioni është veçanërisht i vështirë për shkak të shikueshmërisë së ulët në ujë dhe temperaturave të ftohta në thellësi, ndërsa me kalimin e orëve shpresat për ta gjetur të gjallë po zbehen.

Luigi Cavallari është profesor në Universitetin “Gabriele d’Annunzio” në Chieti-Pescara dhe studiues në fushën e teknologjisë së arkitekturës. Ai dhe ministrja Eugenia Roccella janë të martuar prej dekadash dhe kanë dy fëmijë.