Një 29-vjeçare në Vlorë u hospitalizua pasi u sulmua nga tre burra, të cilët rezultuan të ishin babai, vëllai dhe i fejuari i saj. Ngjarja ndodhi në banesën ku ajo jetonte me prindërit e saj.

Mësohet se shkaku i sulmit ishte refuzimi i saj për të nisur bashkëjetesën me Armandi Janka, 34-vjeçarin që familja e kishte fejuar për të pa pëlqimin e saj. Refuzimi i saj solli dhunën jo vetëm nga i fejuari, por edhe nga babai i saj, Astrit Barjami, dhe vëllai, Erlind Barjami.

Policia e Vlorës mori njoftimin për ngjarjen dhe ndërhyri për të parandaluar eskalimin e dhunës. Tre burrat u arrestuan, ndërsa vajza u transportua në spital, ku gjendja e saj tani është jashtë rrezikut për jetën.

Në banesën ku ndodhi ngjarja, policia sekuestroi një armë gjahu dhe municion luftarak që i përkisnin babait të vajzës, Astrit Barjami.

Në një ngjarje tjetër të dhunës familjare në Klos, dy vëllezër u konfliktuan për një arsye të çastit në fshatin Gurë e Vogël. Policisë iu arrit të arrestojë 38-vjeçarin Rufat Tusha dhe sekuestroi një pistoletë pa leje në banesën e tij.