Ukraina po përballet me një valë të përshkallëzuar sulmesh ruse ndaj rrjetit të saj hekurudhor, me dëme që arrijnë 1 miliard dollarë dhe një trefishim të numrit të sulmeve muajt e fundit.
“Që nga fillimi i vitit ka pasur 800 sulme mbi infrastrukturën hekurudhore, dhe më shumë se 3.000 objekte hekurudhore janë dëmtuar. Ata synojnë trenat, duke tentuar veçanërisht të vrasin drejtuesit e tyre”, tha Oleksei Kuleba, zëvendëskryeministër i Ukrainës.
Hekurudhat janë jetike për Ukrainën, duke transportuar mbi 63% të mallrave, përfshirë eksportet e grurit, dhe 37% të pasagjerëve. Ndihma ushtarake nga vendet e huaja shpesh mbërrin përmes hekurudhave, ndërsa aeroportet civile nuk funksionojnë që nga pushtimi i plotë i vendit.
Sipas Oleksandr Pertsovski, kreu i hekurudhave shtetërore, sulmet nuk janë vetëm në masë, por edhe në mënyrën e veprimit: “Tani Moska po përdor dronët e saktë ‘Shahed’, që synojnë lokomotivat individuale”.
Ekspertët paralajmërojnë se kjo strategji ka për qëllim shkatërrimin e një nga sistemet më kritike logjistike të Ukrainës dhe pengimin e qarkullimit të mallrave dhe ndihmave humanitare.
