Një tjetër histori integrimi dhe angazhimi vjen nga komuniteti shqiptar në Itali. Ervin Cakerri, i lindur në Shqipëri në vitin 1980 dhe banues prej më shumë se dy dekadash në Macerata, ka shpallur kandidaturën për Këshillin Bashkiak në zgjedhjet administrative të 24-25 majit 2026.
Cakerri garon nën siglën e listës qytetare UniAmo Macerata, në mbështetje të kandidatit për kryetar bashkie Gianluca Tittarelli.
Aktualisht, ai mban detyrën e “Istruttore Amministrativo” pranë Erap Marche, ku merret me menaxhimin e procedurave administrative komplekse, shpesh edhe në rolin e përgjegjësit të procedimit. Rruga e tij profesionale ka nisur nga sektori i shërbimeve, ku për vite me radhë ka punuar si barman dhe kamerier, përpara se të konsolidohej në administratën publike.
Paralelisht me punën, Cakerri ka ndërtuar një profil të fortë akademik në fushën juridike dhe administrative. Ai është diplomuar në Jurisprudencë në Università degli Studi di Macerata, ndërsa më pas ka përfunduar një sërë specializimesh, përfshirë Shkollën e Specializimit në të Drejtën e Punës. Ai zotëron titullin e avokatit si në Shqipëri, ashtu edhe në Itali, i njohur nga Ordine Nazionale Forense.
Së fundmi, në dhjetor 2025, ai ka përfunduar një Master të Nivelit të Dytë në Shkencat Administrative dhe Inovacionin e Administratës Publike, një program i përbashkët mes Università degli Studi di Macerata dhe Università degli Studi di Urbino.
Në prezantimin e tij publik, Cakerri thekson rrugëtimin e nisur si student i ri në Itali, ku – sipas tij – ka ndërtuar jetën, familjen dhe karrierën. Ai e konsideron kandidimin si një mënyrë për t’i kthyer komunitetit atë që ka marrë ndër vite.
Programi i tij fokusohet te përfshirja sociale, bashkëpunimi mes institucioneve dhe qytetarëve, si dhe rritja e rolit të komuniteteve në vendimmarrje. Ai synon një qytet më gjithëpërfshirës, më të gjelbër dhe më të sigurt.
Në thirrjen e tij për votuesit, ai kërkon mbështetje për listën “UniAmo Macerata”, duke ftuar qytetarët që të shënojnë mbiemrin e tij në fletën e votimit.
Kandidimi i tij shihet si një tjetër dëshmi e përfshirjes në rritje të shqiptarëve në jetën politike dhe publike të Italisë.
