Vangjel Tavo, kandidati i PS-së për Kryebashkiak të Himarës, ka votuar rreth orës 10:30 në qendrën e votimit në Palasë. Në një deklaratë për mediat, Tavo e cilësoi procesin e votimit deri tani si të qetë dhe shprehu dëshirën që kjo atmosferë të vazhdojë deri në përfundimin e tij.

Ai bëri thirrje për qytetarët me të drejtë vote që të marrin pjesë në numër të madh dhe të zgjedhin alternativën më të mirë për ta. “Sot Himara dhe himariotët kanë fjalën për të votuar. Procesi ka qenë shumë i qetë, uroj që ky proces të vijojë kështu deri në fund të procesit të votimit. I bëj thirrje të gjithë himariotëve të dalin masivisht në votime dhe të votojnë alternativën më të mirë,” tha Tavo.

Sa i përket shqetësimeve mbi votuesit me karta identiteti të skaduara që nuk janë lejuar të votojnë, Tavo theksoi se ligji ka përcaktuar qartë rregullat. “Nuk kam asnjë koment, ligji ka të parashikuar gjithçka,” përfundoi ai.