Shumëkush e konsideron mëngjesin si vaktin më të rëndësishëm të ditës, por një studim i publikuar në eLife sugjeron se zgjedhja e ushqimit në këtë vakt mund të bëjë diferencë për shëndetin e zemrës.

Studimi përfshiu 4,778 persona të moshës 30–79 vjeç, nga të cilët 1,377 nuk kishin histori me sëmundje kardiovaskulare, ndërsa 3,401 kishin pasur më parë probleme të tilla. Pjesëmarrësit u pyetën për zakonet ushqimore, përfshirë konsumimin e vezëve, mishit, orizit dhe perimeve.

Rezultatet treguan se ata që konsumonin vezë rregullisht kishin nivele më të larta të Apolipoproteina A1, një komponent që lidhet me formimin e lipoproteinave me densitet të lartë (HDL), të njohura si “kolesteroli i mirë”, i cili ndihmon në uljen e rrezikut për sëmundje të zemrës dhe goditje në tru.

Po ashtu, pjesëmarrësit që përfshinin vezët në dietën e tyre kishin më pak metabolitë të lidhur me problemet kardiovaskulare.

“Rezultatet ofrojnë një shpjegim të mundshëm se si konsumimi i sasive të moderuara të vezëve mund të ndihmojë në mbrojtjen kundër sëmundjeve të zemrës,” u shpreh autori i studimit, Canking Yu.

Megjithatë, studiuesit theksojnë se nevojiten kërkime të mëtejshme për të konfirmuar plotësisht lidhjen shkak-pasojë mes konsumit të vezëve dhe uljes së rrezikut për sëmundje kardiovaskulare.