Kristian Sterjo, 20-vjeçari i akuzuar për vrasjen e Johan Zukos në Korçë, është lënë në masën e sigurisë “arrest në burg” nga Gjykata e Korçës.

Sterjo u paraqit në gjykatë nën masa të shtuara sigurie, ku u zhvillua seanca për caktimin e masës së sigurisë ndaj tij.

20-vjeçari akuzohet për veprat penale “Vrasje me paramendim” dhe “Mbajtje pa leje dhe prodhim i armëve, armëve shpërthyese dhe municionit”.

Ngjarja e rëndë ndodhi disa ditë më parë në lagjen nr. 14 në Korçë, ku mbeti i vrarë Johan Zuko.

Pas ngjarjes, policia dhe grupi hetimor nisën punën për zbardhjen e plotë të rrethanave dhe dokumentimin e provave që lidhen me ngjarjen. Ndërkohë, hetimet vijojnë për të përcaktuar dinamikën dhe motivin e krimit.