Pasditen e sotme, Kristian Marku, 30 vjeç, mbeti viktimë e një atentati me armë zjarri në aksin Fier-Vlorë. Policia ka konfirmuar se Marku nuk ishte emër i panjohur për autoritetet, pasi ai kishte precedentë penalë për “vrasje me dashje në bashkëpunim të mbetur në tentativë” dhe “mbajtje pa leje të armëve të zjarrit dhe municionit luftarak”.

Në vitin 2023, Marku, i njohur gjithashtu si Kristi Bardhi, ishte skeduar nga policia si i dyshuar për një ngjarje të ndodhur më 26 mars në Rrëshen, ku pati të shtëna ndaj Saimir Reçit. Kjo ka ngritur dyshime se vrasja mund të lidhet me një hasmëri mes fiseve.

Në shtator të vitit 2023, ai u arrestua nga policia e Kurbinit pasi u kap me një armë zjarri pa leje. Marku, i cili u sinjalizua për të ndaluar në afërsi të fshatit Shëmri, hodhi armën e mbushur nga dritarja e makinës për t’u shpëtuar autoriteteve.

Ndërkohë, hetimet po vijojnë për të zbardhur dinamikën dhe motivet e këtij atentati tragjik, që tronditi opinionin publik pas një tjetër ngjarjeje të ngjashme sot në Tiranë, ku mbeti i vrarë Bujar Nasufi.