Kryeministri i Shqipërisë, Edi Rama, ka publikuar një “videokartolinë” nga Konferenca Ndërqeveritare mes Shqipërisë dhe Bashkimit Europian, e mbajtur një ditë më parë në Bruksel.

Në postimin e tij në Facebook, Rama ka ndarë momente nga para dhe gjatë zhvillimit të takimit, duke theksuar ndjesinë e afrimit të Shqipërisë me BE-në dhe duke shprehur krenari për ecurinë e vendit në procesin europian.

“MIRËMËNGJES dhe me krenarinë për Shqipërinë çdo hap e më shumë Europiane, ju uroj një ditë të mbarë”, shkruan Rama në postim.

Në pamjet e publikuara shfaqen edhe momente prapaskene para konferencës, ku Kryeministri shihet në një sallë së bashku me ministrat Ferit Hoxha, Besfort Lamallari, Toni Gogu dhe Delina Ibrahimaj, si dhe kryenegociatoren Majlinda Dhuka, duke diskutuar axhendën e takimit.

Në video, Rama dëgjohet duke shkëmbyer batuta me bashkëpunëtorët e tij:

“Ça kemi tani, çfarë do bëjmë?”, dëgjohet të thotë ai, ndërsa merr përgjigje mbi procedurat e konferencës.

Më tej, kryeministri shprehet me ironi gjatë diskutimit:

“We accept… do ta themi tani…”

dhe më pas vijon me një tjetër batutë në anglisht:

“Do you accept to marry him? Yes, I do. Do you accept to marry her? Yes, I do.”

Pamjet janë shpërndarë gjerësisht në rrjet, duke sjellë një moment më informal nga prapaskenat e një prej takimeve më të rëndësishme në procesin e integrimit europian të Shqipërisë.