WhatsApp pritet të prezantojë një funksion të ri që do t’u lejojë përdoruesve të komunikojnë në platformë pa pasur nevojë të ndajnë numrin e tyre të telefonit me kontaktet e reja.

Veçoria e re, e cilësuar nga platforma si një përmirësim i rëndësishëm i privatësisë për mbi 3 miliardë përdorues në mbarë botën, do të mundësojë krijimin e një emri unik përdoruesi direkt përmes aplikacionit celular.

Pas aktivizimit të këtij funksioni, përdoruesit do të mund të shkëmbejnë emra përdoruesi në vend të numrave të telefonit kur nisin biseda të reja. WhatsApp ka bërë të ditur se përdorimi i emrit të përdoruesit do të jetë opsional dhe ata që preferojnë mund të vazhdojnë të përdorin numrat e telefonit.

Emrat e përdoruesit do të mund të ndryshohen ose hiqen në çdo moment dhe do të kenë një kufizim deri në 35 karaktere. Sipas kompanisë, ky opsion do t’u japë mundësi përdoruesve të ruajnë më shumë privatësi, pasi kontaktet e reja nuk do të kenë akses automatikisht te numri i tyre.

Megjithatë, një numër telefoni do të vijojë të jetë i nevojshëm për krijimin dhe mirëmbajtjen e një llogarie WhatsApp.

Kompania ka njoftuar se përdoruesit do të marrin njoftim sapo funksioni të jetë aktiv për llogaritë e tyre. Mundësia për të rezervuar një emër përdoruesi do të shfaqet fillimisht te cilësimet e llogarisë ose profilit në aplikacionin celular, ndërsa në fazat e para nuk do të jetë e disponueshme në versionet web dhe desktop të WhatsApp.