Deputetja dhe zëvendëspresidentja e Partisë së Lirisë, Erisa Xhixho, ka reaguar pas votës së mazhorancës në Komisionin e Ligjeve kundër projektligjit të kësaj force politike për uljen e çmimit të naftës.

Sipas saj, vendimi ishte i pritshëm dhe nuk përbën surprizë.

“Asgjë surprizë! I pritshëm vendimi i mazhorancës për të rrëzuar projektligjin e Partisë së Lirisë për uljen e çmimit të naftës,” u shpreh Xhixho.

Ajo theksoi se Shqipëria renditet ndër vendet me çmimin më të lartë të karburantit dhe se pjesa më e madhe e çmimit përbëhet nga taksat.

“Sot jemi të 9-t në botë për çmimin më të lartë të naftës dhe mbi 60% e çmimit të naftës përbëhet nga taksat,” deklaroi ajo.

Xhixho ngriti gjithashtu shqetësimin për rritjen e çmimeve të produkteve të shportës, duke akuzuar qeverinë se nuk po merr masa për të lehtësuar qytetarët.

“Janë rritur me 50% ushqimet e shportës dhe kjo qeveri nuk merr asnjë masë për të mbështetur qytetarët,” shtoi ajo.

Deklaratat u bënë gjatë një mbledhjeje të Komisionit të Ligjeve, ku u diskutua propozimi i Partisë së Lirisë.