Një zjarr i madh ka përfshirë një parkim nëntokësor në kantonin Aargau, Zvicër, duke shkaktuar dëme të konsiderueshme materiale.

Zëdhënësi i policisë kantonale, Bernhard Graser, deklaroi se garazhi ishte plotësisht i mbushur me tym dhe gjithçka ishte mbuluar nga një shtresë e zezë nga djegia.

Një automjet luksoz Lamborghini është shkrumbuar plotësisht, ndërsa 76 makina të tjera kanë pësuar dëmtime të ndryshme nga flakët dhe nxehtësia e lartë. Gjithashtu, tavani i parkimit ka pësuar dëmtime strukturore, gjë që mund të kërkojë ndërhyrje të mëdha riparuese.

Parkimi shërbente për një bllok pallatesh dhe kishte kapacitet për 100 automjete.

Fatmirësisht, nuk raportohet për të lënduar, ndërsa autoritetet kanë nisur hetimet për të përcaktuar shkakun e zjarrit.

Zjarrfikësit dhe ekipet e emergjencës kanë punuar për orë të tëra për të shuar flakët dhe për të siguruar zonën nga rreziqe të mëtejshme.