Policia e Vlorës ka vënë në pranga 33-vjeçarin Elmaz Fejzaj, i cili akuzohet për ndezjen e zjarrit që përfshiu malin e Shashicës dhe mori përmasa të frikshme.

Sipas hetimeve, Fejzaj kishte ndezur flakët për të pastruar një sipërfaqe me qëllim hapjen e kullotave të reja, por zjarri doli jashtë kontrollit duke djegur një pjesë të malit dhe duke rrezikuar zonat e banuara në Kaninë dhe Sherishtë.

Një tjetër zjarr i madh u regjistrua në zonën e mbrojtur të Malit me Gropa, ku u arrestua një 63-vjeçar. Flakët shkrumbuan rreth 600 hektarë kullota dhe bimësi në Grykën e Mullinit dhe Qafën e Qershisë, brenda Parkut Kombëtar të Dajtit.

Po ashtu, në Shijak u arrestua një 58-vjeçar pasi dogji mbeturina në pronën e tij dhe zjarri u përhap duke rrezikuar banesa.

Policia ka vënë në pranga edhe autorë të dyshuar për zjarrvënie në Kakavijë të Gjirokastrës, Frakull të Vogël në Fier dhe në Cërrik, ndërsa 6 persona të tjerë u proceduan në gjendje të lirë për zjarre të shkaktuara nga pakujdesia në Fier, Sarandë, Kurbin, Dibër, Shkodër dhe Poliçan.

Autoritetet theksojnë se strukturat policore në të gjithë vendin janë në gatishmëri të plotë, me urdhër për masa të rrepta parandaluese dhe ndëshkuese ndaj zjarrvënësve.