Një shofer 31-vjeçar është gjobitur dhe proceduar penalisht në Sarandë, pasi parkoi automjetin e tij mbi trotuar duke bllokuar kalimin e këmbësorëve dhe duke penguar qarkullimin e mjeteve.
Ngjarja ndodhi më 26 korrik, rreth orës 23:30, në rrugën “Vangjel Pandi”. Gjatë kontrolleve rutinë, shërbimet e Policisë konstatuan një automjet tip “Benz” të parkuar në mënyrë të parregullt. Pas identifikimit të drejtuesit, shtetasit E. D., 31 vjeç, banues në Kamëz, materialet iu referuan Prokurorisë dhe ndaj tij nisi procedimi penal për veprën “Pengimi i qarkullimit të mjeteve të transportit”, sipas nenit 293 të Kodit Penal.
Përveç procedimit penal, ai u ndëshkua edhe me një gjobë administrative prej 20 000 lekësh, në bazë të Kodit Rrugor.
Policia e Sarandës apelon qytetarët të respektojnë rregullat e qarkullimit dhe të shmangin parkimet e parregullta, të cilat pengojnë lëvizjen dhe rrezikojnë sigurinë e të tjerëve.
