Një banesë në fshatin Mesul të Pukës u përfshi nga flakët pasditen e sotme, duke shkaktuar dëme të mëdha. Banesa, në pronësi të Ardian Kecit, i cili ndodhej në kurim në QSUT, dyshohet se u dogj për shkak të një shkëndije elektrike. Zjarri shpërtheu shpejt, duke u shtrirë në pak minuta.

Geraldo Keci, djali i familjes, rrëfen se ata ishin duke ngrënë kur vunë re zjarrin në tavan. “Ishim duke ngrënë bukë dhe kemi parë zjarrin në tavan që kishte rënë, nuk e dimë nga erdhi. I kam marrë mamin, nënë dajën dhe i kam nxjerrë jashtë. Na janë djegur televizori, dushi, raftet, kolltuqet, frigoriferi, lavatriçja,” tha ai.

Shërbimi zjarrfikës nuk arriti të intervenonte për shkak të mungesës së rrugës automobilistike. Pranë vendit të ngjarjes, përfaqësues të Bashkisë së Pukës shprehën shqetësim për situatën dhe apeluan për ndihmë ndaj familjes. Ferit Ringaj, nënkryetar i Bashkisë, theksoi: “Dëmet janë të konsiderueshme. E gjithë banesa është jashtë funksionit. Fatmirësisht nuk kemi dëme në njerëz, por na nevojitet angazhimi i strukturave vendore dhe të shtetit për t’i ardhur në ndihmë kësaj familje.” Ai gjithashtu bëri thirrje për ndihmë nga bizneset lokale.