Ka përfunduar në tragjedi ngjarja e rëndë e regjistruar më 24 maj në periferi të Tiranës, ku një 17-vjeçar i plagosur me armë zjarri në kokë ka ndërruar jetë në Spitalin e Traumës.

I riu ndodhej prej ditësh në gjendje kritike për jetën, por pavarësisht ndërhyrjes së mjekëve nuk arriti t’u mbijetojë plagëve të marra.

Ngjarja dyshohet se ka ndodhur në zonën e Kthesës së Kamzës, brenda një banese ku një grup të rinjsh ishin mbledhur së bashku. Sipas hetimeve paraprake, 19-vjeçari Rigels Sylaj po u tregonte shokëve një armë zjarri që e posedonte pa leje, kur ajo është shkrepur aksidentalisht.

“Gjatë manipulimit, arma është shkrepur në mënyrë aksidentale, duke kapur në kokë 17-vjeçarin”, bëjnë me dije burime hetimore.

Fillimisht, të rinjtë i kanë thënë policisë se kishin dëgjuar të shtëna nga jashtë banesës dhe e kishin gjetur viktimën të plagosur në oborr, por kjo dëshmi nuk ka rezistuar gjatë.

Sipas të dhënave nga hetimi, nën presionin e provave të mbledhura në vendngjarje dhe marrjeve në pyetje, ata kanë pranuar se ngjarja kishte ndodhur brenda në dhomë dhe se arma ishte në duart e 19-vjeçarit Sylaj.

Trupi i pajetë i të miturit është dërguar në morg, ndërsa hetimet vijojnë për të përcaktuar përgjegjësitë penale të të gjithë personave të përfshirë, përfshirë edhe ata që dyshohet se tentuan të fshehin rrethanat e ngjarjes.