Më shumë se 200 mijë vende pune në Gjermania mund të rrezikohen gjatë këtij viti si pasojë e ndikimeve ekonomike të luftës në Iran, sipas një raporti të Allianz Trade, të cituar nga transmetuesi gjerman n-tv.
Kompania e sigurimit të kredive paralajmëron se rritja e falimentimeve të bizneseve mund të çojë në humbje masive të vendeve të punës. “Konflikti në Lindjen e Mesme tashmë po ka një ndikim të rëndësishëm në Gjermani dhe lufta tregtare me SHBA-në ende nuk ka përfunduar”, deklaroi Milo Bogaerts, drejtues për Gjermaninë, Austrinë dhe Zvicrën.
Sipas parashikimeve, falimentimet në Gjermani pritet të rriten me 2.4% gjatë këtij viti, duke arritur në rreth 24,650 raste – niveli më i lartë në 14 vitet e fundit.
Të dhënat nga Zyra Federale e Statistikave tregojnë se gjatë vitit të kaluar janë regjistruar 24,064 falimentime, një rritje prej rreth 10.3% krahasuar me vitin pararendës.
Ndërkohë, shefja ekzekutive e kompanisë, Aylin Somersan Coqui, theksoi se në nivel global pritet një rritje prej 6% e falimentimeve të bizneseve, e ndikuar ndjeshëm nga tensionet gjeopolitike.
Ekspertët vlerësojnë se lufta në Iran po rrit presionin mbi sektorë kyç si transporti, industria kimike dhe metalet, për shkak të kostove të larta të energjisë.
Megjithatë, sipas projeksioneve, situata mund të përmirësohet në vitin e ardhshëm, me një rënie të mundshme prej 2% të falimentimeve në Gjermani, në rreth 24,150 raste, nëse tensionet zbuten dhe masat ekonomike japin efekt.
