Një bandë prej gjashtë emigrantësh të paligjshëm është kapur nga autoritetet britanike në një operacion të gjerë antidrogë në Nottinghamshire, ku u zbulua një plantacion i madh kanabisi në një njësi industriale të braktisur në Mansfield.

Policia e Nottinghamshire tha se në momentin e ndërhyrjes u gjetën “pak më shumë se 4,800 bimë”, të kultivuara në faza të ndryshme rritjeje.

Të gjashtë të arrestuarit, të identifikuar si shqiptarë, janë:
Ardit Gjonaj (37), Lanti Avapai (45), Elton Salihasi (41), Artu Ruqu (44), Eldis Beneri (34) dhe Robert Ruko (47).

Ata janë deklaruar fajtorë për përfshirje në prodhimin e kanabisit, ndërsa një akuzë e dytë për posedim me qëllim furnizimi të drogës së klasit B është pranuar nga prokuroria.

Në deklaratën e saj, detektivja Millie Gillett tha:

“Kishim arsye të besonim se kjo vendndodhje po përdorej për qëllime të paligjshme dhe dyshimet tona u konfirmuan shpejt, kur hymë brenda dhe zbuluam një fermë kanabisi jashtëzakonisht të madhe me përmasa industriale.”

Ajo shtoi gjithashtu se operacioni kishte si qëllim largimin e drogës nga tregu ilegal dhe parandalimin e shpërndarjes së saj.

Seanca e dënimit për të gjashtë të pandehurit është shtyrë dhe pritet të zhvillohet më 30 qershor, ndërsa ata do të qëndrojnë në paraburgim deri në atë datë.