Zbardhen detaje të reja nga ngjarja e rëndë e ndodhur në Sarandë, ku një automjeti iu vendos lëndë plasëse në një akt të dyshuar si tentativë për vrasje.

Policia e Sarandës njofton se ka identifikuar, kapur dhe ndaluar një 21-vjeçar, i cili dyshohet si bashkëpunëtor i dy autorëve të tjerë të shpallur më herët në kërkim për këtë ngjarje.

Sipas njoftimit zyrtar, gjatë operacionit për arrestimin e të riut, forcat e policisë kanë ushtruar kontroll në banesën e tij, ku është gjetur dhe sekuestruar një armë zjarri pistoletë me municion luftarak, e cila është marrë në cilësinë e provës materiale.

Policia bën me dije se hetimet po vijojnë nën drejtimin e Prokurorisë, me qëllim identifikimin dhe kapjen e personave të tjerë të përfshirë në ngjarje.

Ngjarja daton më 05.02.2026 dhe sipas hetimeve paraprake lidhet me një tentativë për eliminimin e një shtetasi përmes vendosjes së eksplozivit në automjetin që ai drejtonte.