Pesë persona janë arrestuar në Kosovë nën dyshimin për përfshirje në një rrjet të krimit të organizuar, i cili dyshohet se ka trafikuar drogë në disa vende evropiane dhe ka pastruar miliona euro të përfituara nga aktivitetet kriminale.

Arrestimet u kryen të martën në kuadër të operacionit ndërkombëtar “White Star”, pas një hetimi trevjeçar të mbështetur nga Europoli dhe autoritetet e Belgjikës, Francës dhe Holandës. Sipas Europolit, hetimi është ndërtuar kryesisht mbi analizën e komunikimeve të shkëmbyera në platformën e koduar SKY ECC, e përdorur gjerësisht nga grupet kriminale në Evropë.

Mesazhet e dekriptuara kanë mundësuar identifikimin e anëtarëve kryesorë të organizatës, gjurmimin e rrjedhave financiare dhe zbulimin e mënyrës së funksionimit të rrjetit kriminal.

Në një komunikatë të përbashkët, Prokuroria Speciale dhe Policia e Kosovës thanë se aksioni u zhvillua në Prishtinë, Pejë, Prizren, Viti dhe Drenas, me urdhër të Gjykatës Themelore.

Gjatë kontrolleve janë sekuestruar: gjashtë armë, 239 fishekë, rreth 9.7 gramë kokainë, mbi 35 gramë fara marihuane, 25 telefona mobilë, 10 kompjuterë, 10 automjete, një motoçikletë, 16 orë dore dhe 7.595 euro para të gatshme.

Sipas Europolit, grupi kriminal operonte nga Kosova, ndërsa anëtarët e tij koordinonin trafikun ndërkombëtar të drogës dhe menaxhonin pastrimin e fitimeve të paligjshme në disa shtete evropiane. Po ashtu, që nga fillimi i hetimit janë hetuar 42 persona, janë kryer 76 kontrolle dhe janë sekuestruar pasuri me vlerë të vlerësuar rreth 80 milionë euro.

Operacioni “White Star” është ndër rastet më të fundit në rajon që mbështetet në të dhënat e SKY ECC, komunikimet e së cilës u dekriptuan në vitin 2021 dhe kanë shërbyer si bazë për qindra hetime në Evropë, përfshirë edhe në Shqipëri, ku SPAK ka përdorur këto të dhëna për një sërë operacionesh kundër krimit të organizuar dhe korrupsionit.

Europoli theksoi se operacioni u zhvillua në kuadër të Task Forcës Operative LIMIT, ndërsa një ekspert i agjencisë ishte i pranishëm në Kosovë gjatë aksionit për të mbështetur shkëmbimin e informacionit në kohë reale.