Ka nisur këtë të mërkurë zbatimi i ligjit për amnistinë penale në të gjitha institucionet e ekzekutimit të vendimeve penale në vend, duke sjellë lirimin e menjëhershëm të qindra të dënuarve dhe ulje dënimi për qindra të tjerë.

Sipas të dhënave zyrtare të publikuara nga Ministria e Drejtësisë, 541 persona përfitojnë lirim të menjëhershëm, ndërsa 803 të dënuar përfitojnë ulje dënimi.

Po ashtu, 173 raste përfitojnë nga rillogaritja e dënimit, ndërsa 67 të dënuar nga bashkimi i dënimeve. Në të kundërt, 609 persona nuk përfitojnë nga amnistia, pasi nuk plotësojnë kriteret e përcaktuara në ligj.

Institucionet e vuajtjes së dënimit me numrin më të madh të të liruarve janë burgu i Lushnjës me 127 të liruar, burgu i Fierit me 104 dhe ai i Reçit me 101.

Ministri i Drejtësisë, Toni Gogu, ka theksuar se nga amnistia nuk përfitojnë personat e dënuar për vepra penale të hetuara nga SPAK dhe Gjykata e Posaçme Kundër Korrupsionit dhe Krimit të Organizuar (GJKKO), si edhe autorët e një sërë veprash të rënda penale të përjashtuara shprehimisht nga ligji.

Mes emrave që kanë tërhequr vëmendje në këtë amnisti janë Rozeta Dobi, e dënuar për vjedhjen e banesës së ish-zyrtares Alda Klosi, si edhe Erisa Fero, ish-punonjëse e AKSHI-t, e dënuar në një çështje të lidhur me trafik narkotikësh.

Procesi i lirimit po zhvillohet në të gjitha burgjet e vendit nën mbikëqyrjen e autoriteteve përgjegjëse dhe pritet të përfundojë brenda ditës.

Amnistia penale synon, krahas efektit humanitar për kategori të caktuara të të dënuarve, edhe uljen e mbipopullimit në institucionet e vuajtjes së dënimit.