Një aksident me pasojë plagosjen e një 13-vjeçari është regjistruar mbrëmjen e kësaj të mërkure në qytetin e Vlorës.

Sipas informacioneve paraprake, ngjarja ka ndodhur në lagjen “29 Nëntori”, ku një automjet i Policisë Bashkiake, i drejtuar nga një efektiv, ka përplasur një fëmijë rreth 13 vjeç.

Burime bëjnë me dije se në momentin e aksidentit, i mituri ishte duke kaluar rrugën në vijat e bardha.

Menjëherë pas ngjarjes, 13-vjeçari është transportuar në spital për të marrë ndihmën e nevojshme mjekësore. Fatmirësisht, sipas të dhënave paraprake, ai ndodhet jashtë rrezikut për jetën.

Në vendngjarje kanë mbërritur shërbimet e policisë, të cilat kanë nisur verifikimet dhe po punojnë për të zbardhur rrethanat e plota të aksidentit, si dhe për të përcaktuar përgjegjësitë.