17-vjeçarja Noela Caka, e cila humbi jetën një ditë më parë nga meningiti akut, ishte nxënëse në gjimnazin “Leonik Tomeo” në Durrës. Pas këtij lajmi tragjik, shkolla ka reaguar në rrjetet sociale duke shprehur ngushëllimet për humbjen e vajzës dhe duke e përshkruar atë si një nxënëse të dashur dhe të qeshur, e cila do të mungojë pafundësisht.

Noela kishte qenë ekskursion me klasën në Voskopojë javën e kaluar dhe kishte pasur një gjendje virale më 11 dhjetor, që sipas prindërve i kaloi shpejt. Megjithatë, më vonë ajo shfaqi dhimbje koke të forta dhe të vjella, duke u përkeqësuar shpejt. Ajo u transportua në spitalin e Durrësit dhe më pas në QSUT, por ndonëse përpjekjet e mjekëve, humbi jetën.

Autoritetet shëndetësore kanë filluar hetimet për të gjurmuar personat që kanë pasur kontakte me Noela-n, ndërsa ambientet e shkollës do të dezinfektohen për të parandaluar përhapjen e mundshme të infeksionit.

“Me hidhërim të thellë njoftojmë ndarjen nga jeta, të nxënëses tonë N.C., për arsye shëndetësore. Të gjithë u mblodhën për t’i dhënë lamtumirën e fundit të mirës, të dashurës, të qeshurës, piktores tonë N. Është e vështirë të përshkruhet dhimbja që ndiejmë të gjithë. Ky ishte një lajm i pabesueshëm. Nuk është e lehtë të gjenden fjalët kur zemra është e rënduar nga humbja. N., do të na mungosh pafundësisht por do të jesh gjithmonë në zemrat tona. Qoftë shpirti yt në paqe! Ngushëllime familjarëve!”- thuhet në reagimin e shkollës.