Deputeti i Partisë Demokratike të Kosovës (PDK), Hisen Berisha, ka komentuar rrëzimin e vendimit nga Komisioni Qendror i Zgjedhjeve (KQZ) për listën serbe, duke theksuar se ky është pjesë e një skenari të parapërgatitur për fushatën zgjedhore. Ai e konsideron këtë veprim si një përpjekje të vazhdueshme nga ana e Serbisë që nga viti 2022 për të shfrytëzuar zhvillimet në Kosovë për të krijuar efekte elektorale.
Berisha e cilëson si të pritur këtë situatë, duke shtuar se fushata zgjedhore ka filluar që pas ngjarjeve tragjike të vitit 2022, kur u vra një polic në Banjskë, dhe se këto zhvillime, përfshirë sulmet dhe barrikadat, janë përdorur për të arritur qëllime elektorale. Ai gjithashtu përmendi faktin që lista serbe ka nevojë të rishikohet për shkeljet penale dhe kushtetuese që mund të jenë bërë gjatë këtyre periudhave.
Berisha kritikoi veprimet e politikanëve që nuk kanë qenë pjesë e krijimit të shtetit të Kosovës dhe që, sipas tij, po veprojnë në dëm të Kosovës dhe në shërbim të Serbisë. Ai gjithashtu theksoi se faktori kombëtar nuk është përfshirë në këto skenarë, duke aluduar në ndikimin e Serbisë dhe liderëve të saj në këto zhvillime.
“Ka qenë e pritur. Ne jemi pothuajse në fushatë zgjedhore. Sa i përket pozitës, qeverisë ata kanë qenë në fushatë elektorale që nga fillimi, nga 2022 dhe kur u vra polici në Banjskë dhe në atë moment fatkeqësie kanë dashur të përfitojnë. Këto zhvillime qofshin ato më tragjike si ai sulm apo sulmi i kanalit apo loja me largimin nga salla të gjitha këto i shpërbejnë efekteve elektorale.
U pa dhe puna e listës serbe, kam bërë një reagim që lista serbe duhet të rishikohet të gjitha shkeljet penale apo kushtetuese nëse vërejmë barrikadat apo sulmet mbi KFOR janë nxitur dhe vetë. Atje udhëhiqet me ligjin e të fortit që është Radoiçiç që shkon deri te Vuçiç.
Sa i përket mekanizmave për të imponuar se kush do jenë pjesë e listës ka, por kjo formë ishte thjeshtë dhe skenar për efekt elektoral dhe çdo veprim i bërë deri më sot ka qenë i kësaj natyre prandaj nuk na ka surprizuar asgjë deri më tani.
Këta kanë deficit se në moshën e duhur s’kanë qenë pjesë e krijimit të shtetit të Kosovës dhe bëjnë të tilla veprime vetëm që ta dëmtojnë Kosovën dhe që janë në shërbim të Serbisë. Sa i përket faktorit kombëtar nuk është i përfshirë në këto skenarë. Në detaje fshihet djalli thonë, shiko vetëm në momentin që u mor ky vendim, nuk votuan fare abstenuan nga vendimi dhe më pas dolën direkt me deklaratë që ja këto janë vendimet.”
Sa i përket ndalimit të ministrit të Punëve të Brendshme të Kosovës, Xhelal Sveçla, për të vizituar Luginën e Preshevës, Berisha tha se kjo lidhet me krizën politike në Serbi, e cila është përshkallëzuar nga protestat kundër Presidentit Aleksandër Vuçiç. Ai parashikoi se Serbia do të vazhdojë të përballet me krizë të brendshme, dhe se kjo situatë mund të ketë pasoja të mëtejshme.
