Një shtetas turk i shpallur në kërkim ndërkombëtar është arrestuar nga autoritetet shqiptare në pikën kufitare të Morinës. Bayram Yildiz, 39 vjeç, banues në Turqi, u ndalua teksa tentonte të hynte në Shqipëri, pavarësisht se ishte i dënuar nga Gjykata e Bursas me 15 vite, 2 muaj dhe 15 ditë burgim për falsifikim dokumentesh dhe mashtrim.
Policia Kufitare e Morinës, në bashkëpunim me Drejtorinë Vendore të Policisë Kukës dhe Interpol Tiranën, realizoi ndalimin e tij pas verifikimeve të hollësishme në vijë të dytë.
Në një njoftim zyrtar, Policia e Shtetit bëri të ditur se Interpol Tirana ka nisur procedurat për ekstradimin e tij në Turqi, në bashkëpunim me autoritetet turke.
Ky operacion është pjesë e angazhimit të autoriteteve shqiptare për rritjen e sigurisë kufitare dhe ndalimin e personave të shpallur në kërkim ndërkombëtar që tentojnë të kalojnë përmes territorit shqiptar.
