Tiranë – Një operacion kompleks dhe i rrallë neurokirurgjik është kryer me sukses në Qendrën Spitalore Universitare “Nënë Tereza” në Tiranë, ku një paciente 24-vjeçare iu nënshtrua një ndërhyrjeje për heqjen e një tumori të madh epidural nga zona torakale (T5-T6).

Lajmin e ka bërë të ditur Ministrja e Shëndetësisë dhe Mbrojtjes Sociale, Albana Koçiu, përmes një postimi në rrjetet sociale, ku ka vlerësuar punën e ekipit të Neurokirurgjisë dhe teknologjinë e avancuar që ka mundësuar suksesin e operacionit.

Operacion i rrallë me teknologji moderne
Sipas profesor Kita Sallabanda, tumori i diagnostikuar ishte një rast tepër i rrallë për shkak të vendndodhjes së tij dhe presionit që ushtronte mbi palcën kurrizore.

Kirurgjia u realizua nga ekipi i përbërë nga:
Prof. Kita Sallabanda
Prof. Artur Xhumari
Dr. Myfit Saraci
Dr. Jetmira Kerxhaliu
Infermieret Refije Kadiu dhe Anxhela Gjonaj

Teknikat e përdorura përfshinë aspiratorin ultrasonik, një teknologji moderne që lejon heqjen e tumorit me saktësi të lartë dhe minimalizim të dëmtimit të indeve nervore.

Pacientja vuan nga një sëmundje e rrallë
Pacientja 24-vjeçare diagnostikohet me Neurofibromatozë Tipi 2, një sëmundje e rrallë gjenetike që shkakton formimin e tumoreve të shumta në sistemin nervor. Sipas Prof. Sallabandës, ajo ka gjithsej 22 tumore, të cilat po trajtohen në mënyrë graduale.

Rezultate të shkëlqyera për jetën e pacientes
Pas operacionit, mjekët konfirmuan se ndërhyrja ishte e suksesshme dhe pacientja është në fazë rikuperimi. Kjo ndërhyrje e rrallë konfirmon nivelin e lartë të specializimit dhe teknologjisë së aplikuar në Neurokirurgjinë shqiptare.