Të hënën, 22 janar, Parlamenti i Shqipërisë do të rikthehet në sesionin e tij të fundit para zgjedhjeve të 11 majit, ku veprimtaria do të jetë e kufizuar për shkak të periudhës zgjedhore. Gjatë këtij sesioni, një çështje e rëndësishme që pritet të diskutohet nga deputetët e opozitës do të jetë propozimi i Gazment Bardhit, i cili ka kërkuar që deputetët të vetëdeklarojnë nëse kanë përdorur aplikacionet SkyEç dhe Encrochat, të cilat janë përfolur për lidhje me aktivitetet kriminale dhe përdorimin e tyre nga grupe të ndryshme.

Për shkak të afërsisë me periudhën zgjedhore, Kuvendi do të ketë disa kufizime në punën e tij. Në përputhje me Kodin Zgjedhor dhe Kushtetutën, ka disa masa që pengojnë veprimtarinë e zakonshme të institucioneve. Gjatë fushatës zgjedhore, e cila do të nisë më 11 prill dhe do të zgjasë deri më 11 maj, nuk do të mbahen mbledhje të komisioneve dhe seanca plenare.

Për më tepër, sipas Kodit Zgjedhor, gjatë periudhës së fushatës, Kuvendi nuk mund të miratojë ligje që mund të sjellin përfitime për kategori të caktuara të shoqërisë, si rritje pagash apo pensionesh, pasi ato mund të cilësohen si manovra fushate.

Sipas Kushtetutës, Parlamenti i Shqipërisë nuk mund të nxjerrë ligje gjatë periudhës 60 ditë para mbarimit të mandatit, e cila fillon më 10 korrik dhe përfundon më 10 shtator.

Një tjetër çështje që mund të jetë në fokus gjatë këtij sesioni janë ndryshimet në Kodin Zgjedhor për të lehtësuar procesin e votimit për diasporën në zgjedhjet e 11 majit. Ky mund të jetë momenti i fundit që Partia Socialiste dhe Partia Demokratike do të bashkojnë votat për miratimin e ndryshimeve, para se të nisin betejën elektorale për zgjedhjet e ardhshme.