Një ngjarje e rëndë tronditi qytetin e Shkodrës paraditen e 18 shkurtit, ku 34-vjeçari Kolë Manaj qëlloi me armë zjarri në kokë partneren e tij, 44-vjeçaren Anila Ndoka (Prendushi), dhe më pas kreu vetëvrasje.

Ngjarja dhe Dinamika

Sipas informacioneve, ngjarja ndodhi rreth orës 11:15 në lagjen “Mark Lula”, ndërsa çifti ndodhej brenda një automjeti. Burime nga grupi hetimor bëjnë me dije se mes tyre kishte nisur një debat, që përfundoi tragjikisht kur Manaj nxori pistoletën dhe qëlloi fillimisht partneren e tij dhe më pas veten.

34-vjeçari humbi jetën në vend, ndërsa Anila Ndoka (Prendushi) mbeti e plagosur rëndë dhe u transportua menjëherë në spital, ku ndodhej në gjendje kritike me një plumb në kokë, diten e sotme ajo nderroi jete.

Historia e Çiftit dhe Konflikti

Anila Ndoka, nënë e tre fëmijëve dhe e divorcuar, kishte një lidhje pesëvjeçare me Kolë Manajn. Dy javë më parë, ajo kishte vendosur t’i jepte fund marrëdhënies, vendim që 34-vjeçari nuk e kishte pranuar. Sipas burimeve, Manaj i kishte dërguar një video duke tentuar vetëvarjen për ta detyruar të mos largohej. Pas këtij akti, ajo pranoi të takohej për sqarim, takim i cili rezultoi fatal.

Të Dhënat e Para të Hetimeve

Në brendësi të automjetit u gjet një armë zjarri e llojit pistoletë, e cila u përdor nga Manaj për kryerjen e krimit. Policia dhe Prokuroria e Shkodrës kanë ngritur një grup hetimor për zbardhjen e plotë të rrethanave të ngjarjes.

Kjo tragjedi ka shkaktuar tronditje të madhe në Shkodër, duke rikthyer edhe një herë në vëmendje problematikën e dhunës në marrëdhëniet familjare dhe sociale.