Një ngjarje tronditëse ka tronditur opinionin publik në Athinë, ku djali 24-vjeçar i një biznesmeni të njohur grek është rrëmbyer dhe torturuar barbarisht nga katër persona, mes të cilëve edhe gjuetari i njohur Ivan Greko. Ngjarja e rëndë ndodhi mëngjesin e 6 majit në rajonin e Ymittos dhe ka marrë përmasa të një krimi të organizuar me motive zhvatjeje.

Sipas hetimeve të Policisë greke, viktima u sulmua fizikisht nga tre persona, të cilët përdorën mjete të mprehta për t’i shkaktuar dëmtime serioze në këmbë. Pasi e kërcënuan me jetë, e futën me forcë në një automjet dhe e transportuan në disa zona të Athinës, ku u takuan me bashkëpunëtorin e katërt.

Autorët i kërkuan 24-vjeçarit një shumë prej 25 mijë eurosh dhe një motoçikletë BMW me të njëjtën vlerë, ndërkohë që torturat fizike ndaj tij nuk ndaluan. Në zonën e Saronidës, ata e kërcënuan me armë zjarri dhe tentuan t’i presin gishtat me një mjet prerës, por nuk arritën ta përfundonin aktin falë rezistencës së viktimës.

Falë ndërhyrjes së shpejtë të oficerëve të Drejtorisë Kundër Krimit të Organizuar dhe një operacioni të koordinuar në tre lokacione të ndryshme të kryeqytetit grek, autorët u arrestuan dhe ndodhen tashmë në pranga në pritje të përballjes me drejtësinë.

Ngjarja ka shkaktuar reagime të forta në opinionin publik grek, ndërsa hetimet vijojnë për të zbardhur të plotë motivet dhe përfshirjen e personave të tjerë të mundshëm në këtë rrëmbim makabër.