Drejtoria e Forcës së Posaçme Operacionale finalizoi operacionin “Operacionalja 47”, duke arrestuar në Elbasan 50-vjeçarin Zamir Halili, i shpallur në kërkim ndërkombëtar nga autoritetet italiane.

Halili ishte i dënuar në Itali me 7 vjet burgim për plagosje, dhunë në familje dhe marrëdhënie seksuale me dhunë. Në momentin e arrestimit, atij i mbeten për të vuajtur rreth 6 vite e 9 muaj dënim.

Arrestimi u bë falë bashkëpunimit të ngushtë mes Policisë së Shtetit, Interpol Tiranës dhe Interpol Romës, me shkëmbim të shpejtë informacioni dhe veprime të mirëorganizuara policore.

Interpol Tirana po vijon bashkëpunimin me autoritetet italiane për finalizimin e procedurave të ekstradimit të 50-vjeçarit drejt Italisë.