Ahmedabad, Indi – Një aeroplan i linjës ajrore Air India me destinacion Londrën u rrëzua sot menjëherë pas ngritjes nga aeroporti i Ahmedabadit në Indinë perëndimore, duke shkaktuar panik dhe një emergjencë masive në zonën përreth.

Fluturimi AI171, i cili operonte në lidhjen Ahmedabad – Londër Gatwick, kishte në bord 242 pasagjerë kur humbi kontaktin vetëm disa sekonda pas ngritjes, në lartësinë rreth 190 metrash. Sipas të dhënave të faqes “Flightradar24”, sinjali i fundit u regjistrua në orën 08:08:51 UTC.

Pas rrëzimit në një zonë banimi pranë aeroportit, një re e dendur tymi i zi u ngrit mbi vendngjarje, ndërsa ekipet e emergjencës u nisën menjëherë për shpëtimin e të mbijetuarve dhe menaxhimin e situatës.

Policia lokale konfirmoi se avionit i kishte ndodhur një aksident në një “zonë civile” jashtë aeroportit dhe raportohet se disa pasagjerë u panë duke u transportuar me barela dhe ambulanca drejt spitaleve.

Kryetari i Air India, Natarajan Chandrasekaran, përmes një postimi në rrjetin social “X”, shprehu ngushëllimet më të thella për familjet e viktimave dhe garantoi se kompanitë po bashkëpunojnë ngushtë me autoritetet për të ofruar mbështetje maksimale për të gjithë të prekurit.

“Mendimet tona janë me familjet dhe të dashurit e të gjithë atyre që u prekën nga kjo ngjarje shkatërruese,” tha Chandrasekaran, duke theksuar se fokusi kryesor është mbështetja dhe asistenca për viktimat.

Ndërkohë, autoritetet indiane vazhdojnë hetimet për shkakun e aksidentit, ndërsa komuniteti ndërkombëtar ndihet i tronditur nga kjo tragjedi ajrore që po merr përmasa të mëdha.