Pamjet nga kamerat e sigurisë të një lokali në Fushë-Krujë kanë dokumentuar momentet e para pas një atentati me armë zjarri që ka tronditur zonën. Policia dyshon se autorët kanë qëlluar nga ana tjetër e rrugës, përballë lokalit, duke shmangur çdo identifikim të drejtpërdrejtë – asnjë autor dhe asnjë automjet i dyshimtë nuk shfaqet në video.

Ngjarja ndodhi mbrëmjen e kaluar, kur Mond Voga, pronari i lokalit dhe ish-shofer i ish-prokurorit dhe aktualisht deputetit të PD-së, Arjan Ndoj, ndodhej në ambientet e brendshme së bashku me bashkëshorten dhe fëmijët.

Fatmirësisht nuk raportohet për të plagosur, ndërsa policia është në ndjekje të autorëve të dyshuar, duke hetuar pistën e një atentati të mirëorganizuar me motiv hakmarrjeje apo paralajmërimi.

Mond Voga është një emër i njohur për autoritetet, për shkak të lidhjes së tij me ngjarjen e bujshme të vitit 2019, kur Arjan Ndoj, në atë kohë prokuror, mbeti i plagosur në një atentat mafioz në autostradën Durrës-Tiranë.

Hetimet për atentatin në Fushë-Krujë janë në fazë intensive, ndërsa banorët e zonës shprehen të tronditur nga ngjarja, duke kërkuar më shumë prani policore për sigurinë në qytet.