Një 21-vjeçar norvegjez, Mads Mikkelsen, ka deklaruar se është ndaluar, marrë në pyetje dhe më pas dëbuar nga Shtetet e Bashkuara të Amerikës, pasi zyrtarët e emigracionit në aeroportin Newark, New Jersey, kanë gjetur në telefonin e tij një meme tallëse ndaj zëvendëspresidentit amerikan JD Vance.

Sipas mediave norvegjeze, Mikkelsen mbërriti më 11 qershor për të kaluar pushimet në SHBA, por nuk arriti të kalojë kontrollin kufitar. Ai u ndalua, u pyet nga oficerët amerikanë dhe më pas u vendos në një qeli të aeroportit, për t’u dëbuar më vonë po atë ditë.

Në një intervistë për gazetën Nordlys, ai e përshkroi përvojën si një akt “abuzimi me pushtetin dhe ngacmim të padrejtë”. Ai deklaroi se oficerët i kërkuan me presion fjalëkalimin e telefonit dhe e pyetën në mënyrë të përsëritur nëse ishte i përfshirë në trafik droge, terrorizëm apo ekstremizëm të djathtë.

Pas kontrollit të telefonit të tij, autoritetet thuhet se hasën në një meme ku JD Vance paraqitej pa flokë. Kjo, sipas Mikkelsen, u mor si arsye për refuzimin e hyrjes dhe dëbimin e menjëhershëm.

Rasti i tij vjen pak ditë pas një tjetër incidenti të bujshëm, ku shkrimtari australian Alistair Kitchen u ndalua për 12 orë në aeroportin e Los Angeles gjatë një ndalese transiti për në Nju Jork dhe u kthye në Melburn. Ai pretendoi se ndalimi kishte lidhje me qëndrimet e tij pro-palestineze dhe shkrimet publike në mbështetje të protestave në Universitetin Columbia.

Departamenti Amerikan i Sigurisë Kombëtare ka mohuar pretendimet, duke i cilësuar si “tërësisht të pavërteta”, por rastet e fundit kanë ngjallur shqetësime mbi përdorimin e kontrollit kufitar për qëllime politike apo cënim të lirisë së shprehjes.